في الجيش في مركز التدريب دايما كتايب العليا (الجامعيين) بتبقي صداع مزمن في راس صف الضباط بسبب كلامهم و شكاويهم.
السرية بتاعتنا كانت دايما بتشتكي من الصول احمد و في يوم فضل يزعق جامد فقفشنا إننا مش هننفذ الأمر... ارقد... ارقد س7.... مش عاوزين ترقدوا طيب لليمين در... معتدل مارش
و دورنا الصول أحمد من ارض الطابور (ارض الكفار) زي ما بيسموها و دخلنا من طريق مدخلناهوش قبل كدة
الصول دة كان صعيدي جلنف و مفكر اننا عيال طرية بتوع الجامعة و مش ننفذ الأوامر علشان الجري و الشمس بتحرقنا و احنا شباب فافي.
المهم و احنا ماشيين قالنا عارفين أنا هوديكوا فين... انا هدخلكوا أرض الموانع.. أمال اية و تطلعوا بقي تنطوا من التبة و تتشبعطوا بالحبال و اللي يقع و رجلة تتكسر و ايدة... انا معايا 15% خساير مسموح بيها في التدريب.
احنا تحمسنا اوي و بعد ما كنا بنتلكع في المشي بدأنا نضبط الخطوة العسكرية و نخبط الارض جامد و صوت الخطوة يبقي كلة مع بعضة و كأننا في عرض عسكري و بدأنا نسألة عن التدريبات اللي هناك.
الصول استغرب و قاللنا مبسوطين انكوا هتروحوا ارض الموانع! طيب يلا من دلوقتي زحفة الجريح بقي علي ركبكوا علشان الزلط يورم رجليكوا و ركبكوا... ورانا ازاي و احنا وراة زي الفل
فضلنا كدة لحد ما وصلنا لأرض الموانع و احنا مبسوطين و حماسيين فالصول طبعا مكملش و دورنا علي طابور الهتاف.
و مغلسش علي السرية بتاعتنا تاني
احنا جيل مش كسول ولا مكسلين او خايفين ندخل أرض الموانع. احنا جيل محبط لانة شايف ان كلة محصل بعضة مفيش أمل ولا فايدة .. يتلكع في طابور النضافة و الهتاف لأن شايف ان مالوش لازمة... لكن يتحمس و ينضبط جدا و يستمتع كمان بضرب النار و دخول أرض الموانع
No comments:
Post a Comment